35-vjet nga greva e minatorëve të Kosovës, momenti që dridhi ish-Jugosllavinë

Të mbledhur në minierën e Trepçës, minatorët kosovarë përkujtuan sot 35 vjetorin e grevës së minatorëve, moment ky që u vlerësua se tronditi themelet e ish-Jugosllavisë.

Në këtë grevë e cila zgjati tetë ditë, minatorët kërkuan atëkohë të drejtat kushtetuese dhe protestuan kundër revokimit të autonomisë së Kosovës të garantuar sipas Kushtetutës së vitit 1974 të Jugosllavisë Socialiste.

Para minatorëve të mbledhur, kryeministri i Kosovës Albin Kurti tha se 20 shkurti i vitit 89’ ishte ditë e madhe e asaj pranvere.

“Menjëherë pas ditës së pavarësisë, ne nderojmë rrënjët e shtetit tonë. Minatorët porositën qartë se populli jonë nuk heq dorë për të vendosur për veten. Më 20 shkurt të vitit 1989, minatorët u ngujuan për heqjen e autonomisë. Fjala ‘Trepçë’ mori një kuptim të fuqishëm dhe politik, dhe kjo vazhdoi në ditën e fundit. Kështu një komuniteti minatorësh u kthye në vetëdije me guxim politik që dridhi gjithë ish-Jugosllavinë”, tha Kurti.