Kroacia fikson kursin e frangut zviceran për 1 vit

Bëhet fjalë për mijëra familje, të cilat prej sot do të flenë rehat dhe nuk kanë nevojë t‘i shikojnë kurset e këmbimit të valutave

Frangu zviceran është fiksuar në 6.39 kuna kroate për 1 vit, ndërsa shpenzimet do t’i bartin institucionet financiare, ka deklaruar kryeministri kroat, Zoran Milanoviq, në një konferencë të jashtëzakonshme, raporton televizioni kroat HRT

„Bëhet fjalë për mijëra familje, të cilat prej sot do të flenë rehat dhe nuk kanë nevojë t‘i shikojnë kurset e këmbimit të valutave. Për 1 vit është e mundur të ketë bisedime për konvertimin e kredive në kuna kroate. Mirëpo, për këtë na duhet ndihma e Bankës Nacionale të Kroacisë“, ka deklaruar Milanoviq.
Kufizimin e kursit Qeveria do ta procedojë në Kuvend nëpërmjet ligjit të kredive. Kryetari i Parlamentit të Kroacisë, Josip Leko, ka konfirmuar se Qeveria deri në fund të javës do të propozojë një zgjidhje ligjore për problemin e qytetarëve me kreditë në franga zvicerane dhe ka paralajmëruar që të premten do të vihet në rend dite një propozim i këtillë.

Javën e kaluar frangu zviceran është forcuar me vendimin e Bankës Nacionale të Zvicrës, e cila ka hequr kufizimet trevjeçare kundrejt euros.