Zvicra mbështet punësimin në Kosovë

Zyra Zvicerane për Bashkëpunim dhe Ministria e Tregtisë dhe Industrisë kanë nënshkruar marrëveshje për promovimin e punësimit në sektorin privat në vlerë 5.7 milionë franga

Ministrja e Tregtisë dhe Industrisë, Hykmete Bajrami dhe drejtori i Zyrës Zvicerane për Bashkëpunim në Kosovë, Markus Baechler kanë nënshkruar një marrëveshje për Projektin për promovimin e punësimit në sektorin privat. Kjo marrëveshje në vlerë 5.7 milionë franga, konsiderohet si injeksion për punësimin në Kosovë.

Po ashtu ky projekt, siç u tha, parasheh rritjen e punësimit fitimprurës dhe të qëndrueshëm për gratë dhe burrat në Kosovë, përmes ndërmarrjeve të vogla dhe të mesme (NVM), që operojnë në sektorë ekonomikë konkurrues dhe të mirë-organizuar, ku politikat publike përputhen më mirë me nevojat e sektorit privat.

NVM-të e sektorëve të përzgjedhur, sipas marrëveshjes, do të rrisin produktivitetin e tyre dhe do të gjenerojnë të hyra shtesë dhe punësim.

Ministrja Bajrami, pasqyroi prioritetet dhe objektivat strategjike të Ministrisë të cilën e drejton, ndërsa rikonfirmoi mbështetje për zhvillimin e sektorit privat. Ajo prezantoi edhe avancimin e politikave tregtare, si dhe përmirësimi i lëvizjes së lirë të mallrave që do të jenë pjesë e strategjisë zhvillimore të ekonomisë vendore.

Po ashtu, ministrja Bajrami bëri të ditur se do të ketë përmirësime të theksuara edhe në qasjen e inkurajimit të investitorëve të huaj për të parë Kosovën si vend atraktiv për investime.

Ndërkaq, Markus Baechler, drejtori i Zyrës Zvicerane për Bashkëpunim, theksoi se kjo marrëveshje do të ketë reflektime pozitive në fusha të ndryshme në sektorin privat në Kosovë, si dhe do të ndikojë edhe në ngritjen e kapaciteteve afariste për zhvillim të qëndrueshëm të afarizmit kosovar.

Vlera e këtij projekti do të jetë 5.7 milionë franga dhe se zbatimin e tij do ta bëjë konsorciumi në përbërje: “Swisscontact”, “Instituti Riinvest” dhe “PEM Consult”, që është përzgjedhur nga Zyra Zvicerane për Bashkëpunim në Kosovë.

Marrëveshja për realizimin e këtij projekti është për periudhën trevjeçare, duke filluar më 16 nëntor 2014 e deri më 15 nëntor 2017.

Përmes këtij projekti, Ministria e Tregtisë dhe Industrisë do të kontribuojë në krijimin e ambientit të favorshëm për zhvillimin e mundësive të punësimit në Kosovë, si dhe do të ndërmarrë të gjitha masat për të siguruar lejet e nevojshme dhe miratimet, në mënyrë që të mundësohet zbatimi i këtij projekti në mënyrë efikase dhe në kohë.