Albion Rrahmani pritet të bëhet shitja më e shtrenjtë në historinë e Rapid Bukureshtit

Futbollisti shqiptar, Albion Rrahmani pritet të bëhet shitja më e shtrenjtë në historinë e Rapid Bukureshtit. Siç raporton “DigiSport”, sulmuesi i Kosovës pritet t’i bashkohet Glasgow Rangersit në Skoci, përcjell albinfo.ch.

Me 17 gola në 26 ndeshje, 23-vjeçari impresionoi në sezonin e tij të parë me fanellën e Rapidit. Dhuroi edhe pesë asistime.

Disa skuadra evropiane kanë shprehur interesim për ish-sulmuesin e Ballkanit. Por destinacioni më i mundur mbetet gjiganti skocez Rangers, të cilët kanë ofruar rreth 6 milionë euro.

Ofertë për Rrahmanin ka dërguar edhe Slavia Praga, por është e ulët në krahasim me atë që kërkon Rapidi. Slavia ka ofruar rreth 3 milionë euro. Prandaj, transferimi në Çeki duket i pamundur.

Transferimi më i shtrenjtë i Rapidit është Rares Ilie, 21-vjeçari që u transferua te Nice për 5 milionë euro.

Rapidi e kishte transferuar Rrahmanin në verën e vitit 2023. Ballkani pati përfituar 600 mijë euro nga shitja e tij.

“Shanset për largimin e Rrahmanit nga Rapidi janë 75 deri në 80 për qind”, shkruan “Digisport” të enjten.