Gjykata Speciale në Hagë ngre aktakuzë ndaj Isni Kilajt

Isni Kilaj Gjykata Speciale

Zyra e Prokurorit të Specializuar në Hagë ka bërë të ditur se ka dorëzuar aktakuzë të ndryshuar kundër ish-komandantit të Ushtrisë Çlirimtare të Kosovës, Isni Kilaj.

Ai ishte arrestuar në nëntor të vitit të kaluar nën dyshimin për pengim të drejtësisë, teksa në muajin maj ishte liruar nën kushte të rrepta. Si kusht paraprak e ka pasur shumën prej 30 mijë eurosh, të cilën duhej t’ia jepte administratores si garanci financiare, transmeton albinfo.ch.

Në muajin maj, kur ishte liruar, u bë e ditur se është pezulluar kërkesa e shqyrtimit të aktakuzës ndaj tij, me synimin se do të paraqitet aktakuzë e ndryshuar dhe tani është njoftuar se aktakuza e ndryshuar është dorëzuar, por nuk është bërë ende publike.

“Në vazhdim të njoftimit të mëparshëm lidhur me çështjen Kilaj në muajin maj, më 18 korrik ZSP-ja ka njoftuar publikisht Gjykatësen e Procedurës Paraprake se ka dorëzuar aktakuzën e ndryshuar kundër Isni Kilajt. Njoftimi, i cili nuk përfshin detaje të mëtejshme, është i disponueshëm këtu”, thuhet në njoftim.