Plazhi i Borshit: Nëntë persona të një familjeje mbeten të bllokuar, gomonia pësoi defekt

Si pasojë e një defekti të gomones, nëntë persona nga Tirana mbetën të bllokuar në afërsi të plazhit Krorëz.

Ata u ndihmuan nga Njësia Speciale e kufirit dhe njësia policore detare në Shqipëri, teksa sipas njoftimit të policisë shqiptare, mes personave që iu dha ndihmë kishte edhe fëmijë, transmeton albinfo.ch.

Tutje u raportua se ata janë transportuar në Portin e Sarandës, në gjendje të mirë shëndetësore.

”Njësia Speciale e Kufirit Delta dhe Njësia Policore Detare në SPK Borsh ndihmuan 9 shtetas nga Tirana, të cilëve u rrezikohej jeta në mjetin lundrues që kishte pësuar defekt në det. Me marrjen e njoftimit, shërbimet e Policisë Kufitare dhe Njësia Policore Detare shkuan menjëherë në drejtim të adresës së dhënë, në afërsi të plazhit Krorëz, dhe konstatuan mjetin lundrues, tip gomone, i cili kishte pësuar defekt në motor. Në bordin e tij ndodheshin drejtuesi dhe 8 familjarët e tij, të cilët kishin dalë së bashku për guidë turistike në këtë zonë. Të nëntë shtetasit u transportuan me mjetin e Njësisë Speciale Delta në Portin e Sarandës, në gjendje të mirë shëndetësore. Gjithashtu, mjeti i tyre lundrues u transportua nga Policia po në këtë port”, thuhet në njoftimin e policisë, shkruan euronews.al.