Bislimi: Më 17 shtator takimi i radhës në Bruksel, ftoj Lajçakun të mohojë dezinformimin e qëllimshëm të mediave serbe

Zëvendëskryeministri i Kosovës, njëherit kryenegociatori në dialogun Kosovë – Serbi, ka reaguar pas raportimeve nga mediumet serbe se pala kosovare e ka refuzuar takimin e ardhshëm në kuadër të dialogut.

Përmes një postimi në rrjetin social “Twitter”, Bislimi ka shkruar se Serbia u mundua të imponojë pika të rendit të ditës “të destinuara për konsum të brendshëm politik”, transmeton albinfo.ch.

“Për bisedimet e ardhshme të procesit të dialogut në Bruksel të vendosura për në 17 shtator, Kosova ka pranuar një takim trepalësh, sipas rendit të ditës të përcaktuar nga ndërmjetësi. Fatkeqësisht, Serbia e refuzoi një takim të tillë duke u përpjekur të imponojë pika të rendit të ditës të destinuara kryesisht për konsum të brendshëm politik. Ftoj emisarin e Bashkimit Evropian, Miroslav Lajçak të mohojë dezinformimin e qëllimshëm nga mediat serbe më poshtë, të cilat thonë në mënyrë të rreme se Kosova refuzoi takimin trepalësh të kryenegociatorëve”, ka shkruar ai.