Sipas BQK-së janë rritur për 1.51 miliardë euro depozitat e ekonomive familjare

Ministri Hekuran Murati thotë se, krahasuar me 4 vitet paraprake, gjatë qeverisjeve të kaluara kjo shumë është për 3-fish më e lartë

Ministri kosovar i Financave, Hekuran Murati, duke përmendur një raport të Bankës Qendrore të Kosovës, shkruan për rritje të depozitave të ekonomive familjare në banka, që sipas tij, u përshpejtua gjatë Qeverisë Kurti.

“Depozitat e ekonomive familjare në valutën euro për herë të parë tejkalojnë shifrën 4 miliardë euro, sipas raportit të publikuar nga BQK për muajin gusht. Siç mund të shihet edhe nga grafikoni më poshtë, ritmi i rritjes përshpejtohet në mënyrë të theksuar gjatë mandatit të Qeverisë Kurti”, ka shkruar Murati në Facebook.

Sipas tij, për 4 vjetët e fundit depozitat e ekonomive familjare janë shtuar për 1.51 miliardë euro, që krahasuar me 4 vjet paraprake gjatë qeverisjeve të kaluara është për 3-fish më e lartë.

“Ky është tregues se rritja ekonomike është gjithëpërfshirëse e nuk po bëhet vetëm për biznese, por për të gjithë qytetarët. E kjo është gjë e mirë, sepse duke pasur më shumë para, ekonomitë familjare blejnë më shumë, gjë që shton qarkullimin e bizneseve, e përfundimisht edhe nevojën për rritje të punësimit”, ka shkruar ai.

Sipas tij, ngjashëm edhe buxheti i shtetit, “përderisa në të kaluarën shërbente për pasurimin e disave, tani orientohet për shtesat e lehonave, shtesat e fëmijëve, mbështetje për studentë e pensionistë, barna esenciale, mbështetje për bujqit, por edhe siguri e mbrojtje”.

 

---