Dy të vdekur nga zjarri në pyll, në Greqi

Dy zjarrfikës janë plagosur lehtë gjatë aksionit të fikjes së zjarrit, thonë në departamentin e zjarrfikësve

Zjarri që ka rënë në një pyll në Greqi ka lënë të paktën dy të vdekur, thonë autoritetet. Ky zjarr është aktiv pranë qytetit të Korinthit në Peloponez. Disa qindra zjarrfikës si dhe avionë dhe helikopterë zjarrfikës janë mobilizuar në detyrë, transmeton albinfo.ch. Sipas autoriteteve, të vdekurit me siguri ishin banorë vendas që ishin raportuar të zhdukur.

Sipas raportimeve të mediave, trupat e djegur të burrave u gjetën pranë fshatit Elliniko. Dy zjarrfikës janë plagosur lehtë me këtë rast, thonë në departamentin e zjarrfikësve për agjencinë e lajmeve AFP.

Zjarri pranë qytetit të Korinthit, 140 kilometra në perëndim të Athinës, shpërtheu të dielën dhe u përhap me shpejtësi nga erërat e forta. Në njoftimin nga Departamenti i zjarrfikësve thuhet se flakët ishin “të vështira për t’u vënë nën kontroll”.

---