Shqipëri: KQZ njofton se votimi i diasporës rrezikon të pamundësohet për shkak të afateve

Foto: KQZ Shqiperi

Në një letër dërguar shtatë partive që kanë përfaqësues në Kuvend, Komisioni Qendror i Zgjedhjeve në Shqipëri ka informuar se ka zhvilluar një takim me të gjithë operatorët e shërbimit postar ndërkufitar, ku është konkluduar se afatet zgjedhore të tanishme mund të pamundësojnë votimin e diasporës.

Kryetari i KQZ-së, Ilirjan Celibashi, informoi partitë se kompanitë e shërbimit postar kërkojnë 30 deri në 45 ditë për dërgimin dhe mbërritjen e fletës së votimit, ndërkohë që KQZ ka afat vetëm 10 deri në 12 ditë.

Sipas tij, duke iu referuar përvojës në vende të tjera të Evropës që aplikojnë votën e diasporës, afatet ende lënë vend për dyshime nëse procesi mund të dështojë.

Mësohet se KQZ ka kryer edhe testime për votimin nga jashtë, por rezultati ka qenë zhgënjyes pasi procesi i dërgimit dhe mbërritjes së zarfit nuk është realizuar brenda 10 ditësh. /TCH