Liderët evropianë mblidhen në Budapest për të diskutuar kthimin e Trumpit

Rama pritet nga Orban, takohet me Zelenskyn, Macron dhe Vuçiçin

Rreth 50 liderë evropianë, përfshirë presidentin e Ukrainës, Volodymyr Zelensky dhe shefin e NATO-s, Mark Rutte, janë mbledhur të enjten në Budapest për të diskutuar për marrëdhëniet e tyre transatlantike.

Ata shpresojnë se nuk do të kenë mospajtime të ngjashme me presidentin e zgjedhur amerikan, Donald Trump, sikur gjatë mandatit të tij të parë.

Kryeministri Edi Rama u prit nga kryeministri hungarez, Viktor Orban, ndërsa ndodhet sot në Hungari për takimin e Komunitetit Politik Europian dhe marrjen e stafetës për samitin e ardhshëm në Tiranë në gjysmën parë të 2025-ës, përcjell albinfo.ch.

Ai po merr pjesë në takimin e pestë të Komunitetit politik Europian, së bashku me 47 kryetarë shtetesh e qeverish nga e gjithë Europa.

Liderët pjesëmarrës do të diskutojnë mbi sfidat e sigurisë me të cilat përballet Europa, në seancën plenare, e cila do të pasohet nga katër sesione kryesore mbi temat e migracionit dhe sigurisë ekonomike.

Sesioni për migracionin do të përfshijë të gjitha aspektet e migracionit, ndërsa ai për sigurinë ekonomike do të diskutojë edhe lidhjen në aspektin e energjisë, transportit, IT-së dhe gjithashtu tregtisë globale.

Rama është takuar gjithashtu me presidentin e Ukrainës, Volodymyr Zelensky, presidentin serb, Aleksandar Vuçiq, presidentin e Parlamentit Evropian, Roberto Mecola dhe kryeministrin e Qeverisë së Maqedonisë së Veriut, Christian Mickoski.

 

---