Kosovë: Qeveria miraton dy nisma që synojnë të forcojnë bashkëpunimin me Maqedoninë e Veriut

Qeveria e Kosovës e ka mbajtur sot mbledhjen e 231-të të saj. Në këtë mbledhje elektronike janë miratuar dy nisma që synojnë ta forcojnë bashkëpunimin me Maqedoninë e Veriut, transmeton albinfo.ch.

Zyra e Kryeministrit ka njoftuar se nisma e parë lidhet me nismën për lidhjen e Protokollit për Implementimin e Marrëveshjes për Pikat e Përbashkëta të Kalimit Kufitar Hani i Elezit – Bllacë dhe Glloboqicë – Jazhincë.

Nisma e dytë është ajo për lidhjen e një Memorandumi të Mirëkuptimit ndërmjet Ministrisë së Ekonomisë së Kosovës dhe Ministrisë së Energjisë, Minierave dhe Burimeve Minerale të Maqedonisë së Veriut.

“Memorandumi në fjalë ka për qëllim bashkëpunimin në sektorin e energjisë, në përputhje me politikat dhe strategjitë kombëtare të të dy vendeve”, thuhet në njoftim.

Ndryshe, nesër në Prishtinë mbahet mbledhje e përbashkët mes qeverisë së Kosovës dhe asaj të Maqedonisë së Veriut.