Muriqi për largimin nga fusha në Bukuresht: “Jemi krenarë”

FFK

Të dielën, kombëtarja e Kosovës ka mbajtur konferencë për media në Prishtinë.

Aty u paraqit futbollisti Vedat Muriqi që foli po ashtu edhe për incidentin dhe largimin nga fusha gjatë ndeshjes kundër Rumanisë në Bukuresht.

Ai tha se ekipi është krenar dhe se kanë marrë një vendim të duhur.

“Jemi krenarë në përgjithësi. Mund të them se jemi krenarë. Kemi marrë një vendim të duhur në atë moment, ngaqë u prekëm emocionalisht dhe moralisht. Ne si futbollistë e kemi mbyllur kapitullin”. Tha Muriqi para mediave.

“Nesër e kemi synim ta mbyllim ciklin me fitore. Jemi të përgatitur. Na pret kundërshtar i vështirë. Nuk pajtohem personalisht në asnjë rezultat tjetër pos fitores. Do të dalim me çdo fuqi që kemi për të pikët e plota dhe ta mbyllim ciklin me fitore. Shpresoj të kemi vazhdimësi”, vazhdoi tutje sulmuesi i Kosovës.

“Sa i përket ndeshjes me Rumaninë kemi stërvitur 4-5 ditë të mira. U vërejt që do të kemi paraqitje të mirë. Shkuam në Rumani me mentalitetin dhe emocionin që e kishim nga loja e parë. Shkuam për fitore. Nuk e patëm fatin me vete për ta shënuar një gol. Po ta kisha shënuar unë ose Edoni në fillim, do të ishte më ndryshe loja. Shpresojmë dhe besoj fuqishëm që do të vazhdojmë kështu. Që prej nesër, ashtu edhe në ciklin e ardhshëm”, ka thënë kapiteni i Kosovës.