Forca e Sigurisë së Kosovës aktivizohet në mbrojtjen e infrastrukturës kritike

Foto FB: Ejup Maqedonci

Kryeministri i Kosovës, Albin Kurti, ka bërë të ditur se një nga vendimet kryesore të mbledhjes së Këshillit të Sigurisë së Kosovës, e mbajtur në orët e para të mëngjesit, ka qenë angazhimi i Forcës së Sigurisë së Kosovës për patrullime dhe vëzhgim të pikave kyçe të infrastrukturës kritike në vend.

Ai ka njoftuar se patrullat e FSK-së janë vendosur në regjionin e Obiliqit dhe Vushtrrisë, duke siguruar mbrojtjen e pikave strategjike të rëndësishme për furnizimin me ujë dhe energji elektrike.

“FSK-ja është angazhuar në mbështetje të autoriteteve civile përmes patrullimeve dhe vëzhgimeve të infrastrukturës kritike në Kosovë”, ka shkruar ai, transmeton albinfo.ch.

Ministri i Mbrojtjes në Kosovë, Ejup Maqedonci, ka theksuar se FSK-ja po përmbush misionin e saj për mbrojtjen e sovranitetit dhe integritetit territorial të Kosovës. Ai tha se vendimet e fundit kanë ardhur si përgjigje ndaj sulmit terrorist në kanalin e ujit të Ibër-Lepencit në fshatin Varagë të Zubin Potokut.

Komandanti i FSK-së, Gjenerallejtënant Bashkim Jashari dhe Shtabi i Përgjithshëm kanë hartuar planifikime të detajuara për angazhimin e njësive ushtarake në pikat më të ndjeshme të infrastrukturës kritike, duke garantuar mbrojtje ndaj çdo rreziku të mundshëm.