Më 3 dhjetor, Kurti dhe Vuçiq takohen me shefen e re të diplomacisë së Bashkimit Evropian

Foto Ilustrim

Kryeministri i Kosovës, Albin Kurti, dhe presidenti serb, Aleksandër Vuçiq, më 3 dhjetor do të zhvillojnë takime të ndara në Bruksel, me shefen e re të diplomacisë së Bashkimit Evropian, Kaja Kallas.

Lajmi për takimet e ndara është konfirmuar nga zëdhënësja e BE-së për politikë të jashtme, Anita Hipper.

Në një konferencë për media, ajo sot u është përgjigjur pyetjeve lidhur me sulmin në kanalin e Ibër-Lepencit më 26 dhjetor dhe për të ardhmen e dialogut Kosovë-Serbi teksa ka përsëritur qëndrimin që BE-ja shprehu një ditë pas sulmit në Varragë të Zubin-Potokut, duke e cilësuar sulmin si terrorist ndaj infrastrukturës kritike të Kosovës dhe ftoi të gjithë që të bashkëpunojnë me autoritetet e Kosovës për të zbuluar kryesit e sulmit dhe që ata të përballen me drejtësinë, transmeton albinfo.ch.

Sa i përket takimeve në Bruksel, Hipper ka sqaruar se ato nuk do të jenë në kuadër të dialogut.

Ndryshe, Kurti dhe Vuçiq në Bruksel do të zhvillojnë edhe takime të ndara me presidentin e ri të Këshillit Evropian, Antonio Kosta.