BE: Delegacioni i Serbisë në Këshillin e Evropës ka shkelur marrëveshjen me Kosovën

pixabay

Bashkimi Evropian vlerëson se delegacioni i Serbisë në Këshillin e Evropës ka shkelur marrëveshjen e arritur në dialogun mes Kosovës dhe  Serbisë kur ka dhënë deklaratë publike se ka arritur të heqë nga rendi i ditës në Komitetin politik për ngritjen e statusit të delegacionit të Kosovës në “statusin e mysafirit special”.

Javën e shkuar Biljana Pantiq Pilja, shefe e delegacionit të Serbisë në Këshillin e Evropës ka thënë për mediat në Serbi se ai delegacion “me sukses” e ka hequr nga rendi i ditës kërkesën e Kosovës. Këtë e ka quajtur si sukses të diplomacisë serbe dhe të presidentit Aleksandar Vuçiq duke shtuar se ka pasur edhe mbështetjen e Spanjës dhe Hungarisë.

“Është qartë se ata nuk janë duke hequr dorë nga qëllimet e tyre për t’u bërë anëtar i plotë i Këshillit të Evropës dhe janë duke bërë përpjekje për të përmirësuar statusin e tyre hap pas hapi. Megjithatë është po ashtu evidente se ata janë duke e humbur gradualisht mbështetjen e ish-sponsorëve të tyre. Duket sikur bashkësia ndërkombëtare është duke e humbur durimin me Kurtin dhe veprimet e tija të njëanshme”, kanë cituar mediat serbe deklaratën e shefes së delegacionit të Serbisë në Këshillin e Evropës.

Por BE e ka cilësuar këtë deklaratë të jetë shkelje e Marrëveshjes për rrugën drejt normalizimit e cila thotë se Serbia nuk do të kundërshtojë anëtarësimin e Kosovës në asnjë organizatë ndërkombëtare. Këtë e ka thënë në përgjigjen e saj për KOHËN zëdhënësja e BE-së për çështje të politikës së jashtme dhe sigurisë, Anitta Hipper.

“Marrëveshja për rrugën drejt normalizimit e pranuar nga Serbia dhe Kosova përmban në nenin 4 paragrafin 2 se Serbia nuk do të kundërshtojë anëtarësimin e Kosovës në asnjë organizatë ndërkombëtare. Deklarata e përfaqësueses së Serbisë në Këshillin e Evropës është shkelje e obligimeve të Serbisë  nga kjo marrëveshje”, ka thënë në përgjigjen e saj kjo zëdhënëse e Bashkimit Evropian./Koha.net