Shqipëria, e bukur edhe gjatë dimrit, Jezerci, ndër pikat që duhet vizituar

Blloku i Jezercës shtrihet në qendër të Alpeve dhe ka reliev më të lartë, më të ashpër dhe më të thepisur. Aty ndodhet maja e Jezercës 2694 m, më e larta në Alpe dhe e dyta në Shqipëri, pas majës së Korabit

Maja e Jezercës, që ndodhet në mes luginës së Valbonës dhe lumit të Shalës është kthyer vitet e fundit në një destinacion për të apasionuarit pas natyrës.

Kryeministri shqiptar Edi Rama ndau sot në rrjetet sociale pamje nga ngjitja në majën e Jezercës nga një grup alpinistësh në këto ditë të para janari, ku është mbuluar edhe nga petku i bardhë i dëborës.

“Maja e Jezercës, më e larta e Parkut Kombëtar të Alpeve, që çdo ditë po eksplorohet nga të apasionuarit pas eksperiencave unike mes natyrës së egër në zemër të alpeve”, shkruan Rama, transmeton albinfo.ch.

Në ditët e para të janarit Parku Kombëtar Alpet e Shqipërisë, një nga territoret më atraktive dhe më magjepsëse të trevave shqiptare me bukuri të shumta natyrore dhe pasuri të mëdha turistike, po vizitohet nga të apasionuarit pas ngjitjeve në mal.

Por edhe gjatë vitit që lamë pas, ky park ishte një ndër më të vizituarit nga turistë vendas e të huaj në 12 muajt e vitit 2024.

Thethi, Vermoshi dhe Boga gjatë 2024 u vizituan nga 457 965 vizitorë, nga të cilët 256 290 vendas dhe 201 675 të huaj. Ndërsa lumi i Gashit, Lugina e Valbonës dhe Lugina e Tropojës janë vizituar nga 177 447 turistë,  nga të cilët 102 548 vendas dhe 74 597 të huaj.

Alpet Shqiptare shtrihen në veri të lumit Drin dhe në perëndim të rrjedhjes së poshtme të lumit Valbona (degë e Drinit). Ato përfshijnë pjesën veriore të vendit dhe zënë rreth 8 % të tij.

Blloku i Jezercës shtrihet në qendër të Alpeve dhe ka reliev më të lartë, më të ashpër dhe më të thepisur. Aty ndodhet maja e Jezercës 2694 m, më e larta në Alpe dhe e dyta në Shqipëri, pas majës së Korabit.

 

---