Presidentja Osmani për njohjet e reja: Një ritëm i cili nuk do të ndalet

Presidentja e Kosovës, Vjosa Osmani, gjatë qëndrimit të saj në Turqi, në kuadër të Forumit Diplomatik, ka deklaruar se procesi i njohjeve ndërkombëtare të Kosovës është zhbllokuar pas një periudhe pesëvjeçare, pasi përmendi se në më pak se një muaj vendi ka marrë dy njohje të reja – një nga Kenia dhe dje nga Sudani.

Ajo ka thënë se këto zhvillime janë një momentum i rëndësishëm për diplomacinë kosovare, pasi vijnë nga dy shtete me ndikim të madh në kontinentin afrikan dhe më gjerë.

“Është një rienergjizim i rëndësishëm i këtij procesi, por përveç këtyre dy njohjeve të fundit, ka edhe suksese të tjera. Kemi arritur të thellojmë marrëdhëniet me shumë shtete, për të cilat Serbia pretendonte se kanë tërhequr njohjen. Këto shtete tashmë i kanë rikonfirmuar raportet dypalëshe me Kosovën”, tha ajo për Televizionin Publik të Kosovës, transmeton albinfo.ch.

Osmani ka thënë se njohjet ndërkombëtare kërkojnë kohë dhe angazhim afatgjatë.

“Ka shtete me të cilat kemi punuar më shumë se një dekadë për të arritur njohjen, e kjo e bën çdo sukses edhe më domethënës”, shtoi ajo, duke theksuar se sa i përket diskutimeve në vend për meritat e këtyre njohjeve, asnjë person serioz nuk duhet ta personalizojë këtë proces.

“Këto janë merita të popullit të Kosovës, të sakrificës sonë dhe të punës së shumë institucioneve, në bashkëpunim të ngushtë me aleatët ndërkombëtarë”, deklaroi ajo.

E pyetur për të ardhmen e saj në politikë, Osmani deklaroi se nuk ka rëndësi e ardhmja e individëve, por e ardhmja e Kosovës. “Unë do të vazhdoj të kontribuoj për vendin tim për një kohë të gjatë.”