Shqipëria në NATO kërkon hetim ndërkombëtar për “Kumanovën”

Është e domosdoshme, tha ministri i Jashtëm Ditmir Bushati, që të përcaktohet nga drejtësia e vendeve të përparuara, ajo që ndodhi të shtunën në Kumanovë

Ministri i Jashtëm i Shqiptarisë, Ditmir Bushati kërkoi nga Aleanca Veriatlantike- NATO një hetim të paanshëm për konfliktin që plasi të shtunën në lagjen e shqiptarëve (lagjja e Trimave) në Kumanovë. Ai këtë kërkesë e adresoi në ministerialin e NATO-s që u mbajt  në Antalia të Turqisë.

Është e domosdoshme, tha Ditmir Bushati, që të përcaktohet nga drejtësia e vendeve të përparuara, ajo që ndodhi në Kumanovë. Vetëm një hetim i tillë, sipas tij, do të qartësonte në mënyrë të plotë, transparente dhe të besueshme, atë që ndodhi fundjavën e shkuar në vendin fqinj.

Duke nënvizuar faktin, që çdo përshkallëzim i mëtejshëm i situatës nuk i shërben qëndrueshmërisë demokratike dhe prosperitetit të Maqedonisë, ministri Bushati ftoi, që gjuha e urrejtjes dhe veprimet ekstreme t’i lenë vend angazhimit ndaj të drejtave themelore, demokracisë, shtetit të së drejtës dhe perspektivës euro-atlantike të Maqedonisë.

“Harmonia e marrëdhënieve ndëretnike, sanksionuar në “Marrëveshjen e Ohrit”, është përcaktuese për të ardhmen euroatlantike të Maqedonisë”, deklaroi ministri Bushati.

Shefi i diplomacisë shqiptare kërkoi një angazhim gjithëpërfshirës të aleancës, kundrejt të gjitha vendeve të Ballkanit Perëndimor, bazuar në kritere të qarta, për konsolidimin e sigurisë në rajon.

Siç raporton TCH, vendet e aleancës, sikundër edhe Sekretari i Përgjithshëm i NATO-s shprehën gjithashtu shqetësimin për situatën në Maqedoni, vend kandidat për në NATO dhe BE. Vendet e NATO-s ngritën shqetësimin e tyre për brishtësinë e sigurisë në Ballkanin Perëndimor.