Serbia jep para për të arrestuarit në Kosovë nën dyshimin për krime lufte

@unsplash

Qeveria e Serbisë ka vendosur të ndajë një asistencë financiare të njëhershme prej 300 000 dinarësh (rreth 2 550 euro) për qytetarët serbë të arrestuar në Kosovë nën dyshimin për përfshirje në krime lufte gjatë viteve 1998–1999, shkruan gazeta serbe “Danas”, transmeton albinfo.ch.

Në njoftimin zyrtar të qeverisë serbe thuhet se kjo ndihmë ka për qëllim mbështetjen e të ndaluarve në përballjen me procedurat ligjore, të cilat autoritetet serbe i konsiderojnë si “persekutim politik”.

“Ndihma është e dedikuar për ata ndaj të cilëve janë duke u zhvilluar procese të inskenuara penale për krimet që pretendohet se janë kryer gjatë konflikteve të armatosura të viteve 1998–1999 kundër shqiptarëve në Kosovë, si dhe në procese të tjera të inskenuara penale që janë iniciuar me qëllim të persekutimit politik,” thuhet në deklaratë.

Autoritetet serbe nuk kanë bërë të ditur se për sa persona do të aplikohet kjo pagesë, por është paralajmëruar se shpërndarja e saj do të bëhet sa më shpejt të jetë e mundur, transmeton albinfo.ch.