Kosovë, marsh simbolik kundër homofobisë

Marshi kundër homofobisë është përkrahur nga USAID, Ministrisë së Kulturës dhe “Civil Right Defender”. Pjesëmarrës në marsh ka qenë edhe ambasadorja Tracey Jacobson

Tri organizata kosovare që merren me mbrojtjen e të drejtave të komunitetit LGBT, Qendra për Emancipim Shoqëror, Qendra për Barazi dhe Liri dhe Qendra për Zhvillimin e Grupeve Shoqërore, kanë organizuar sot në Prishtinë një marsh simbolik kundër homofobisë.

Marshi e ka pasur përkrahjen e Agjencisë amerikane, USAID, Ministrisë së Kulturës dhe “Civil Right Defender”. Një nga pjesëmarrësit e marshit ka qenë edhe ambasadorja amerikane, Tracey Jacobson, ndërsa për nderë të kësaj ditë edhe misioni i BE-së për sundim të ligjit në Kosovës (EULEX) ka ngritur një flamur ylber.

“Në këtë ditë ne e kremtojmë diversitetin dhe e shprehim përkrahje për angazhimet e personave Lezbikë, Homoseksualë, Biseksualë dhe Transgjinorë (LGBT) në mbarë botën për t’i gëzuar liritë e tyre pa paragjykim apo frikë “, tha Gabriele Meucci, Shef i Misionit EULEX.

Të drejtat për LGBT janë pjesë e kritereve politike të Kopenhagës për anëtarësim në Bashkimin Evropian. Secili vend që aspiron t’i bashkohet BE-së, sipas EULEX-it, duhet t’i mbrojë të drejtat e qytetarëve të tij.

“Duke qenë pjesë e vlerave thelbësore të BE-së për tolerancën, kundër diskriminimit dhe barazinë, të drejtat e “LHBT” janë pjesë e kornizës ligjore të BE-së për parandalimin e diskriminimit”, konsideron Meuci në një komunikate për media.

Prandaj, EULEX-i, siç u tha në njoftim, do ta ngrejë flamurin Ylber për t’i demonstruar vlerat thelbësore të trajtimit të barabartë, tolerancës dhe respektimit të diversitetit, dhe sundimit të ligjit për secilin, në veçanti për pakicat si dhe atyre personave që janë të rrezikuar nga diskriminimi apo trajtimi i pabarabartë në bazë të orientimit seksual të tyre.