Kallas do ta takojë Kurtin sonte në një darkë pune

Përfaqësuesja e lartë e BE-së, Kaja Kallas, do ta takojë kryeministrin në detyrë të Kosovës, Albin Kurti, të enjten në mbrëmje, përcjell albinfo.ch.

Siç njoftoi zyra e Kurtit, Kallas do të jetë për darkë pune me të.

“Kryeministri në detyrë, Kurti, sonte në mbrëmje e pret për një darkë pune Përfaqësuesen e Lartë të Bashkimit Evropian për Punë të Jashtme dhe Politikë të Sigurisë, Kaja Kallas, me rastin e vizitës së saj në vendin tonë. Ky takim do të jetë një mundësi e mirë për të diskutuar marrëdhëniet ndërmjet Republikës sonë dhe Bashkimit Evropian, si dhe temat me interes të përbashkët”, ka thënë zëdhënësi i qeverisë në detyrë.

Ishte e paqartë se kë saktësisht do ta takonte Kallasi në Kosovë, pasi në njoftimin e Shërbimit Evropian për Veprim të Jashtëm (EEAS) nuk tregohej.

Përderisa për vizitat në Beograd dhe Shkup thuhej qartë se do t’i takojë presidentët, kryeministrat dhe ministrat e tjerë, për vizitën në Kosovë vetëm thuhet se “do të takohet me përfaqësuesit e partive politike dhe organizatat e shoqërisë civile”.