Kosova me rritje mesatare të çmimeve prej 1.6% në vitin 2024

(KEYSTONE/Alexandra Wey)

Agjencia e Statistikave të Kosovës (ASK) ka publikuar të dhënat vjetore për Indeksin e Harmonizuar të Çmimeve të Konsumit (IHÇK) për vitin 2024, ku rezulton se çmimet e konsumit në vend janë rritur mesatarisht për 1.6% krahasuar me vitin 2023, raporton albinfo.ch.

Sipas raportit të ASK-së, rritja më e theksuar e çmimeve është regjistruar në disa kategori kryesore të konsumit. Ndër to, biletat e fluturimeve shënuan rritjen më të lartë me 10.8%, të ndjekura nga kafeja, çaji dhe kakao (8.0%), pijet alkoolike (6.9%), mallrat dhe shërbimet për mirëmbajtjen e ekonomisë shtëpiake (6.5%) dhe shërbimet financiare (5.8%).

Rritje janë shënuar gjithashtu në: ujë mineral dhe pije joalkoolike (5.3%), takëme dhe qelqurina të kuzhinës (5.2%), ëmbëlsira dhe produkte me sheqer (5.1%), pemë (4.8%), libra dhe gazeta (4.6%) dhe veshje (4.0%).

Faktorë të tjerë që kanë ndikuar në rritjen e IHÇK-së përfshijnë edhe shërbimet e kujdesit personal (3.7%), energjinë elektrike (3.4%), lëndët djegëse të ngurta (3.3%), duhanin (2.7%), bukën dhe drithërat (2.5%), shërbimet hoteliere (2.0%) dhe mishin (1.9%). Këto kategori kanë kontribuar së bashku me një ndikim prej +2.0% në indeksin e përgjithshëm.

Megjithatë, rritja e çmimeve është frenuar nga uljet e regjistruara në disa kategori, ku më të theksuarat janë: karburantet dhe lubrifikantët për transport personal (-4.4%) dhe blerja e automjeteve (-1.8%). Këto dy kategori kontribuuan me një ndikim negativ prej -0.4% në IHÇK.

ASK vlerëson se këto të dhëna tregojnë për një stabilizim të inflacionit në raport me vitet e kaluara, megjithatë, ndikimet sektoriale në shpenzimet e qytetarëve vazhdojnë të jenë të ndjeshme, sidomos në sektorët e transportit dhe ushqimit.