Prishtina mirëpret Forumin Ndërkombëtar për Gratë, Paqen dhe Sigurinë

Sot në kryeqytetin e Kosovës nis punimet Forumi Ndërkombëtar për Gratë, Paqen dhe Sigurinë, i cili organizohet nën patronatin e presidentes Vjosa Osmani dhe pritet të zgjasë dy ditë, transmeton albinfo.ch.

Ky forum përfaqëson një nga ngjarjet më të mëdha ndërkombëtare të këtij lloji në rajon, duke mbledhur mbi 150 folës nga më shumë se 45 shtete të botës, përfshirë liderë politikë, aktivistë, diplomatë dhe përfaqësues të shoqërisë civile.

Sipas njoftimit të Presidencës, gjatë 2 dhe 3 qershorit në Prishtinë do të mbahen mbi 30 panele diskutimi, ku do të trajtohen tema që lidhen me përfshirjen e grave në proceset e paqes, sigurisë dhe vendimmarrjes, me moton: “Kodi i Sigurisë për Brezin Tonë”.

“Forumi është një platformë ku zërat nga e gjithë bota ndajnë vizionin e tyre për një të ardhme më të sigurt, gjithëpërfshirëse dhe të qëndrueshme,” thuhet në njoftimin zyrtar.

Presidentja Osmani ka theksuar më herët rëndësinë e kësaj ngjarjeje si dëshmi e rolit udhëheqës të Kosovës në avancimin e agjendës globale për gratë, paqen dhe sigurinë. Ajo e ka quajtur forumit një mundësi të veçantë për të adresuar sfidat e sigurisë në kohën e krizave globale dhe për të fuqizuar rolin e grave në ruajtjen e paqes dhe demokracisë.

Pritet që ky forum të sjellë rekomandime konkrete dhe rrjete bashkëpunimi ndërkombëtare për të fuqizuar pjesëmarrjen e grave në politikat e sigurisë dhe zhvillimit, transmeton albinfo.ch.