Zvicra mbështet zhvillimin e Prishtinës

Kryetari i Komunës së Prishtinës, z. Shpend Ahmeti, priti një delegacion nga Zvicra i kryesuar nga Sekretari i Shtetit të Zvicrës, Yves Rossier

Sekretari i Shtetit të Zvicrës, Yves Rossier së bashku me një delegacion helvetik, po qëndrojnë për një vizitë studimore në Prishtinë. Ata sot u pritën në një takim nga kryetari Shpend Ahmeti i cili i njoftoi ata me projektet e qeverisjes, ndërsa veçoi angazhimin për reformimin e administratës në shërbim të qytetarëve.

Kryetari Ahmeti e njoftoi sekretarin Rossier edhe lidhur me sfidat në urbanizimin e qytetit, duke filluar nga parandalimi i degradimit të mëtutjeshëm të kryeqytetit, respektivisht ndalimi i ndërtimeve pa leje e deri tek reformat dhe rregulloret që tashmë kanë filluar të zbatohen në këtë drejtori, njofton kumtesa komunale .

Gjithashtu, prefekti i kryeqytetit bashkë me Sekretarin e Shtetit të Zvicrës, vizituan  Qendrën për Këshillim në Karrierë (QKK), e cila do të luajë një rol të rëndësishëm midis nxënësve të shkollave profesionale të Komunës së Prishtinës dhe sektorit privat me qëllim të avancimit të tyre në karrierë në të ardhmen.

Ndryshe, në muajin nëntor të vitit 2014, Komuna e Prishtinës dhe “Helvetas Swiss Intercooparation” në Kosovë, nënshkruan Marrëveshjen e Mirëkuptimit për realizimin e projektit “Rritje e punësimit për të rinjtë”.

“Kjo marrëveshje u nënshkrua me qëllim të realizimit të dy projekteve: “Qendra e Biznesit” cilat do t’iu ndihmojë bizneseve të reja, posaçërisht atyre që eksportojnë shërbime jashtë vendit, duke iu ndihmuar atyre edhe me këshilla, por edhe me gjetjen e kontakteve në mënyrë që të zhvillohen sa më shumë, si dhe “Qendra për Këshillim në Karrierë”, e cila do të lidhë shkollat profesionale të Komunës së Prishtinës”, tha Ahmeti në këtë takim.