Nëna dhe djali që humbën jetën tragjikisht në pishinë, varrosen më 15 qershor në Kanada

Më 15 qershor 2025, në qytetin Laval të Kanadasë, do të zhvillohet ceremonia e varrimit për E. Morinën, 34 vjeç, dhe djalin e saj trevjeçar, E. Morina, të cilët humbën jetën në një ngjarje tragjike. Ata ishin me prejardhje nga Deçani.

Sipas raportimeve, fëmija ka rënë në një pishinë dhe në përpjekje për ta shpëtuar, edhe nëna ka pësuar fatkeqësisht të njëjtin fund tragjik.

Shoqata Shqiptare Kosova-Montreal ka njoftuar se lutjet dhe ceremonia përkujtimore do të mbahen të shtunën në xhaminë “Balkan Muslim Community”, në orën 13:00. Pas ceremonisë fetare, do të realizohet edhe varrimi në varrezat e qytetit Laval, përcjell albinfo.ch.

Ndërkohë, të dielën më 16 qershor, nga ora 10:00 deri në 14:00, do të mbahet e pamja për ngushëllime, po në ambientet e të njëjtës xhami.

Në një deklaratë për mediat, Shoqata Shqiptare Kosova-Montreal ka shprehur ngushëllimet më të thella për familjen Morina, duke theksuar dhembjen e përbashkët që ndjehet në këto momente të rënda për familjen dhe komunitetin shqiptar në Kanada.