Zgjedhjet lokale të 12 tetorit në Kosovë: Diaspora do të votojë vetëm përmes postës

Komisioni Qendror i Zgjedhjeve

Për qytetarët e Kosovës që jetojnë jashtë vendit, zgjedhjet lokale të 12 tetorit do të kenë një ndryshim të rëndësishëm në mënyrën e votimit. Këtë herë, votimi do të bëhet ekskluzivisht përmes postës. Kjo do të thotë se, ndryshe nga zgjedhjet e mëparshme të përgjithshme, përfaqësitë diplomatike nuk do të shërbejnë si qendra votimi.

Zëdhënësi i Komisionit Qendror të Zgjedhjeve (KQZ), Valmir Elezi, sqaroi këtë ndryshim gjatë një interviste në RTK. Ai theksoi se kjo praktikë vjen si pasojë e ndryshimeve të bëra në Ligjin për Zgjedhjet e Përgjithshme, të miratuara gjatë reformës zgjedhore.

“Ligji i ri nuk parashikon mundësinë e votimit në ambasada për zgjedhjet lokale. Prandaj, diaspora do të ketë mundësi të shprehë vullnetin e saj vetëm përmes postës. KQZ do të hapë kuti postare në disa vende ku jetojnë bashkatdhetarët tanë,” shpjegoi Elezi, transmeton albinfo.ch.

Ndryshim tjetër për këto zgjedhje është mënyra e dërgimit të fletëvotimeve. Në vend që votuesit t’i shkarkojnë vetë nga faqja zyrtare e KQZ-së, siç ndodhi më 9 shkurt, këtë herë ata do të marrin pakon e votimit direkt nga KQZ-ja. Shpenzimet për këtë proces do të mbulohen nga vetë institucioni, përveç kthimit të pakos me fletëvotim, që do të jetë në ngarkim të votuesit.

Regjistrimi për të votuar jashtë Kosovës do të jetë i hapur nga data 23 korrik deri më 29 gusht.

Elezi gjithashtu shpjegoi se votimi për kryetar komune dhe për kuvendin komunal janë dy procese të ndara. Një votues ka të drejtë të votojë për kandidatin e një subjekti në garën për kryetar komune, dhe të zgjedhë një subjekt tjetër për asamblenë komunale. Për dallim nga zgjedhjet parlamentare, ku lejohej votimi për deri në 10 kandidatë për deputetë, në zgjedhjet komunale lejohet votimi vetëm për një kandidat të vetëm për kuvendin lokal.

Listat e kandidatëve nga partitë politike duhet të dorëzohen në periudhën nga 26 qershori deri më 13 gusht, dhe të gjithë kandidatët do t’i nënshtrohen verifikimit nga institucionet përkatëse para certifikimit.