Dështon përsëri konstituimi i Kuvendit të Kosovës

Ka dështuar edhe përpjekja e 36-të për konstituimin e Kuvendit të Kosovës, duke thelluar më tej ngërçin institucional që po zvarritet tashmë prej më shumë se dy muajsh, raporton albinfo.ch.

Në këtë vazhdim të seancës konstituive, e cila ka nisur më 15 prill, sërish nuk është arritur të formohet Komisioni për votimin e fshehtë të kryetarit të Kuvendit – pika që ka bllokuar vazhdimisht procesin tashmë për të 27-ën herë radhazi.

Të hënën, në sallën plenare ishin të pranishëm 99 deputetë. Nga ta, vetëm 53 votuan për formimin e Komisionit, një deputet votoi kundër dhe nuk pati asnjë abstenim. Kjo nuk mjaftoi për të kaluar vendimin, duke sjellë edhe një tjetër dështim në procesin e konstituimit të legjislaturës së re.

Kuvendi i Kosovës, që nga 15 prilli, është mbledhur çdo 48 orë në përpjekje për të përfunduar procesin e konstituimit, por deri më tani, pa sukses. Seanca e radhës është caktuar për të mërkurën, më 25 qershor, duke filluar nga ora 11:00, raporton albinfo.ch.