Sot i jepet lamtumira e fundit mërgimtarës që humbi jetën në një aksident në Gjermani

Kosovë: Sot varroset 21-vjeçarja që vdiq në një aksident në Gjermani

Yllka Hoti, e cila vdiq pas një aksidenti në Gjermani, do të varroset sot në fshatin Hoçë e Vogël të Rahovecit, transmeton albinfo.ch.

Në një aksident të rëndë në Gjermani, në afërsi të Reutlingenit, ajo ka ndërruar jetë, siç njofton policia, në një vetaksident në autostradën B28.

Vdekjen e saj e ka konfirmuar familja, e cila ka njoftuar edhe për ceremoninë e varrimit, e cila do të mbahet sot.

Yllka, gjatë udhëtimit, ka humbur kontrollin ndaj veturës dhe ka dalë nga rruga. Aksidenti i rëndë ka ndodhur javën e kaluar, por Yllka ka ndërruar jetë të shtunën.

Për këtë aksident me pasoja të rënda kanë raportuar edhe autoritetet policore gjermane, si dhe mediat gjermane, të cilat shkruajnë se autostrada B28, nga Metzingen drejt Reutlingenit, ishte e mbyllur për një kohë. Ndërhyrja është bërë edhe me helikopter, por, për fat të keq, pasojat ishin tepër të rënda.

Policia po heton të gjitha detajet, ndërsa ne i shprehim ngushëllime familjes Hoti dhe miqve të tyre.

---