Emisarja britanike: Zbatimi i marrëveshjeve ekzistuese është çelësi për Kosovën dhe Serbinë

E dërguara speciale e Mbretërisë së Bashkuar për Ballkanin Perëndimor, Karen Pearce, ka deklaruar se nuk nevojitet një “zgjidhje magjike” për të zgjidhur çështjet ndërmjet Kosovës dhe Serbisë, por thjesht zbatim i marrëveshjeve ekzistuese — asaj të Brukselit dhe Ohrit, transmeton albinfo.ch.

“Marrëveshjet ekzistuese përmbajnë ide shumë të mira dhe praktike. Është jetike që politikanët t’i zbatojnë ato për të ndihmuar qytetarët dhe komunitetet”, ka thënë Pearce, në një deklaratë të transmetuar nga BBC në gjuhën serbe.

Pas gati tri dekadash përvoje diplomatike, Pearce kthehet për herë të tretë në Ballkan, tashmë në rolin e emëruar në shkurt 2025 si pasuese e Sir Stuart Peach. Ajo shërbeu më parë si koordinatore për Ballkanin në Ministrinë e Jashtme britanike deri më 2006 dhe është një nga diplomatet më me përvojë të Mbretërisë së Bashkuar, duke qenë gruaja e parë që ka mbajtur postin e ambasadores në SHBA dhe përfaqësuese në OKB.

Duke folur për situatën aktuale politike, Pearce vuri në dukje mungesën e progresit që nga nënshkrimi i Marrëveshjes së Ohrit në pranverën e vitit 2024. Bisedimet mes Prishtinës dhe Beogradit kanë mbetur të bllokuara për muaj me radhë dhe nuk ka pasur kontakte të nivelit të lartë mes liderëve të të dyja palëve.

“Nuk mendoj se kemi nevojë për një qasje të re apo ndonjë zgjidhje magjike për problemet në Bosnje e Hercegovinë apo në marrëdhëniet mes Kosovës dhe Serbisë”, ka theksuar Pearce.

Diplomatja britanike nënvizoi gjithashtu rëndësinë e stabilitetit dhe bashkëpunimit rajonal, duke shprehur gatishmërinë e Mbretërisë së Bashkuar për të mbështetur përpjekjet që synojnë paqen dhe zhvillimin në Ballkanin Perëndimor, transmeton albinfo.ch.