Të huajt në Zvicër: Si ndryshon jeta krahasuar me shtetasit zviceranë

@unsplash

Referuar të dhënave të fundit nga Zyra Federale e Statistikave (FSO), jeta në Zvicër është ndryshe për të huajt krahasuar me shtetasit zviceranë, veçanërisht në fushat e financave, kushteve të jetesës dhe integrimit social, përcjell albinfo.ch.

Në vitin 2023, personat me prejardhje migrante kishin 5,000 franga më pak të ardhura vjetore në krahasim me vendasit. 15.1% e tyre përballeshin me vështirësi financiare, krahasuar me 5.7% të zviceranëve. Edhe pse varfëria tek të huajt ka rënë në 9.1%, diferenca mbetet e madhe në rajone si Ticino.

Përsa i përket kushteve të jetesës, të huajt jetojnë më shpesh në zona të zhurmshme dhe me më pak hapësirë banimi. Ata gjithashtu përjetojnë më shumë diskriminim racor (27.2%), dhe janë më pak të mbështetur nga rrjetet shoqërore.

Megjithatë, ata tregojnë më shumë tolerancë ndaj diversitetit (78%) dhe kanë besim të krahasueshëm në institucionet zvicerane, madje pak më të lartë se vendasit.

Ndërkohë, për shkak se shumë prej tyre nuk kanë familje në Zvicër, migrantët mbështeten më shumë në çerdhe dhe ambiente pas shkolle për kujdesin ndaj fëmijëve.

Përfundimisht, edhe pse po bëhen përparime në integrim, hendeku mes të huajve dhe vendasve vazhdon të ekzistojë në shumë aspekte të jetës së përditshme.