Alpinistja Laura Dahlmeier nuk i mbijetoi plagëve pas rrëzimit në mal, ndërron jetë

Laura Dahlmeier, dy herë kampione olimpike në biatlon, vdes pas aksidentit tragjik gjatë alpinizmit në Pakistan

Albinfo.ch dje ka shkruar për plagët e rënda që kishte marrë Laura Dahlmeier gjatë alpinizmit, ndërkohë sot menaxhmenti i saj konfirmoi vdekjen e saj.

Biatlonistja gjermane Laura Dahlmeier, dy herë kampione olimpike, humbi jetën tragjikisht gjatë një aksidenti në majën Laila në malet Karakoram të Pakistanit. Aksidenti ndodhi gjatë një ekspedite alpine, ku 31-vjeçarja pësoi plagë të rënda nga të cilat nuk mundi të mbijetojë.

Lajmin për vdekjen e saj e konfirmoi menaxhmenti i kampiones së dyfishtë olimpike, duke shprehur trishtimin e thellë për humbjen e një prej sportisteve më të shquara të biatlonit. Laura Dahlmeier do të mbahet mend jo vetëm për arritjet e saj sportive, por edhe për pasionin dhe guximin që tregoi në sportet e sfidës në natyrë.

Kampionja ishte e njohur për sukseset e saj në biatlon, duke fituar medalje të arta në Lojërat Olimpike, dhe përkushtimin e saj ndaj sporteve malore. Vdekja e saj është një humbje e madhe për komunitetin sportiv ndërkombëtar. /20minute

 

---