Dua Lipa me reagim emocionues pas përfundimit të Festivalit Sunny Hill

Pas një fundjave plot energji, muzikë dhe emocione të paharrueshme, Dua Lipa ka ndarë emocionet e saj pas mbylljes së edicionit të këtij viti të Festivalit Sunny Hill.

Në një postim në rrjetet sociale, këngëtarja me famë botërore shprehu thellësisht mirënjohjen për të gjithë ata që kontribuan në suksesin e festivalit, që nga artistët, ekipi organizues, miqtë dhe deri te fansat.

“Çfarë mënyre magjike për ta përmbyllur edicionin e sivjetshëm të @sunnyhillfestival! Zemra më është mbushur me dashuri dhe falënderime për familjen time të jashtëzakonshme dhe ekipin që punoi pa u lodhur për ta sjellë këtë përvojë të paharrueshme në jetë,” shkroi ajo.

Dua nuk i kurseu falënderimet për të gjithë artistët që performuan, për ekipet e tyre dhe për fansat që e mbushën atmosferën me energji të papërshkrueshme, përcjell albinfo.ch.

“Faleminderit që ndatë energjinë tuaj dhe që ndriçuat çdo moment. Prishtina shkëlqeu edhe më shumë falë jush,” shtoi ajo.

Por veçanërisht, Dua u emocionua nga publiku:

“Dhe për fansat tanë të mrekullueshëm, WOW WOW WOW, sollët dashurinë, gëzimin, shpirtin. Kërcyet, kënduat, festuat me ne dhe e bëtë këtë edicion vërtet të paharrueshëm. Ju falënderojmë nga zemra. Ju duam pafund. Deri vitin tjetër…”

Dua Lipa jo vetëm që ishte pjesë e organizimit, por edhe performoi si artistja kryesore në natën e parë të festivalit. Kjo vizitë kishte një domethënie të veçantë për të, pasi këtë vit ajo mori zyrtarisht shtetësinë e Kosovës, duke shtuar kështu një përkatësi tjetër përkrah asaj britanike dhe shqiptare.