Vdes edhe personi i tretë nga të shtënat në Gjilan, i dyshuari shpallet në kërkim

Ka ndërruar jetë edhe personi i tretë i plagosur nga të shtënat me armë zjarri që ndodhën sot në mesditë në Gjilan, duke e çuar në tre numrin e viktimave. Ngjarja e rëndë ka ndodhur në rrugën “Ibrahim Rugova”, ku disa persona të tjerë mbetën të plagosur.

Fillimisht, Policia e Kosovës raportoi për dy viktima të konfirmuara në vendngjarje dhe disa të plagosur. Më pas, Spitali i Gjilanit njoftoi se një person kishte ndërruar jetë në vend, ndërsa dy të tjerë ishin sjellë pa shenja jete në emergjencë. Një tjetër i plagosur u transferua në QKUK dhe një tjetër po trajtohet në repartin e Ortopedisë.

Policia e Kosovës ka shpallur në kërkim Mefail Shkodrën si të dyshuarin kryesor për vrasjen e trefishtë. Është publikuar fotografia e tij dhe u është bërë thirrje qytetarëve të raportojnë çdo informacion për vendndodhjen e tij përmes stacioneve policore, linjës 192 ose aplikacionit digjital “Lajmëro Policinë”.

Kryetari i Partisë Demokratike të Kosovës, Memli Krasniqi, e ka quajtur ngjarjen një “alarm për pasigurinë dhe kriminalitetin që po rriten” dhe ka kërkuar reagim të shpejtë nga institucionet për të sjellë autorët para drejtësisë.

Policia ka paralajmëruar një konferencë për media lidhur me rastin, e cila pritet të mbahet në orën 18:00.