Gjermani: Njohja e Palestinës në këtë moment do të ishte e dëmshme

Qeveria gjermane ka bërë të ditur se nuk e ka ndërmend ta njohë për momentin Palestinën si shtet të pavarur. Një zëdhënës i saj theksoi se një hap i tillë do ta dobësonte procesin e arritjes së një marrëveshjeje të negociuar për zgjidhjen me dy shtete midis Izraelit dhe Palestinës.

“Qëllimi ynë mbetet arritja e një zgjidhjeje të negociuar me dy shtete, edhe pse aktualisht duket e vështirë. Njohja e Palestinës duhet të ndodhë në fund të këtij procesi, sepse në këtë moment do të ishte kundërproduktive,” deklaroi ai.

Ndërkohë, disa vende si Australia, Britania e Madhe, Franca dhe Kanadaja kanë paralajmëruar se në muajin shtator mund ta njohin shtetin palestinez, megjithëse secila prej tyre ka vendosur kushte të ndryshme. Ky qëndrim është pritur me kundërshtime të forta nga Izraeli, i cili e sheh si një “shpërblim për veprimet e Hamasit”.

Kryeministri izraelit Benjamin Netanyahu madje e quajti kryeministrin australian Anthony Albanese “politikan të dobët dhe tradhtar”, pasi, sipas tij, ky i fundit i ka kthyer shpinën komunitetit hebre në Australi duke mbështetur njohjen e Palestinës.