Arrestohet një i dyshuar për sulmin ndaj KFOR-it dhe Policisë në Zveçan gjatë vitit 2023

Zvecan

Një person i dyshuar për përfshirje në sulmin ndaj trupave të KFOR-it dhe Policisë së Kosovës më 29 maj 2023 në Zveçan, është arrestuar sot nga autoritetet kosovare.

Sipas njoftimit zyrtar, i dyshuari me inicialet Lj.M dyshohet se ka hyrë në Kosovë nga Serbia. Në koordinim me Prokurorinë Speciale, Policia e Kosovës ka ndërmarrë masa për ndalimin e tij, duke vlerësuar rrezikun e arratisjes, qëndrimin e tij në Serbi dhe mundësinë e manipulimit apo zhdukjes së provave, raporton albinfo.ch.

“I dyshuari Lj.M është ndaluar në Komunën e Zveçanit, ndërsa për sigurimin e provave dhe dëshmive është realizuar kontroll në shtëpinë e tij,” thuhet në komunikatë.

Gjatë bastisjes, policia ka sekuestruar një telefon, uniforma të ndryshme ushtarake, dy USB dhe një bluzë me mbishkrim nacionalist, e cila dyshohet se ishte e veshur prej tij ditën e sulmit.

I dyshuari është intervistuar në prani të avokatit dhe përkthyesit, ndërsa me vendim të prokurorit është dërguar në mbajtje për 48 orë. Po ashtu, është inicuar rast penal për veprat: “Bashkim për veprimtari kundërkushtetuese me qëllim të sulmit kundër rendit kushtetues të Republikës së Kosovës”, “Rrezikim i personave nën mbrojtje ndërkombëtare”, “Sulm ndaj personit zyrtar” dhe “Pjesëmarrje në turmë që kryen vepra penale dhe huliganizëm”, raporton albinfo.ch.