Për 5 muaj, zhdoganohen 6 mijë vetura të vjetra

Për 5 muaj, në Kosovë janë importuar 6 mijë vetura të vjetra, nga të cilat shteti ka përfituar 14 milionë euro

Vendimi i Qeverisë për ta hequr limitin prej 13 vjetësh, për zhdoganim të veturave, ka bërë që të rritet dukshëm numri i veturave të vjetra që hyjnë në Kosovë. Për vetëm 5 muaj, janë importuar 6 mijë vetura të vjetra, nga të cilat shteti ka përfituar 14 milionë euro, ndërsa vetura të reja janë importuar vetëm 466 copë, të cilat i kanë sjellë fitime vendit për 1.7 milionë euro.

Sa iu përket veturave të përdorura, vitin e kaluar janë sjellë mbi 16 mijë sosh, nga të cilat buxheti i vendit ka përfituar mbi 36 milionë euro, raporton KTV.

Gati të gjitha veturat e importuara e kanë origjinën e markave të njohura gjermane, të përcjellë nga ato franceze dhe japoneze. Megjithatë, doganat nuk kanë një mekanizëm për të vlerësuar nëse veturat, që tashmë janë zhdoganuar, janë futur në territorin e Kosovës nga jashtë, apo një pjesë e tyre kanë qenë brenda vendit, por nuk kanë qenë në funksion për shkak të viteve të vjetërsisë së tyre.

Ndryshe, me vendimin e fundit për veturat deri në 2000 kubikë, ku hyjnë pjesa dërrmuese e veturave në vendin tonë, çmimet e akcizës sillen nga 400 euro, për ato që janë vetëm 8 vjet të vjetra, deri në 1500 euro, për veturat me vjetërsi mbi 17 vjet. Ndërsa për ato automjete që janë mbi 2000 kubikë, pagesa e akcizës është më e lartë.

Nga mbi 200 mijë vetura që gjenden në vendin tonë, ka edhe vetura të regjistruara, të prodhuara në vitin 1942, ndërsa mbi 15 mijë janë prodhim i 1989-ës. Përpos lejimit të importit të veturave të vjetra, Kosova shquhet edhe për numër të madh tatimesh, që vozitësi është i detyruar t’i paguajë para se t’i lejohet vozitja.