Për tre muaj, 48.900 kosovarë kërkuan azil në BE

Rreth 90 për qind e kërkesave të kosovarëve për azil janë bërë në dy shtete të BE-së, në Hungari 22.800 dhe Gjermani 21.100

Qytetarët e Kosovës e zënë vendin e parë për kërkim azili në shtetet e Bashkimit Evropian, duke lënë mbrapa edhe Sirinë e Afganistanin. Sipas statistikave që ka publikuar Eurostat, në tremujorin e parë të këtij viti, rreth 50 mijë kosovarë kanë kërkuar azil në BE.

Për periudhën 1 janar-31 mars 2015, kërkesë për azil për herë të parë në shtetet e Bashkimit Evropian kanë bërë 48.900 shtetas të Kosovës, ose 26 për qind e totalit të gjithë kërkesave për azil. Ndërsa 90 për qind e tyre, kërkesën e kanë bërë në dy shtete të BE-së, në Hungari 22.800 dhe Gjermani 21.100.

Kosovarët gjithashtu prijnë me kërkesa për azil edhe në Francë dhe Luksemburg. Ndërsa shtatit e Sirisë kanë bërë 21.900 kërkesa për azil. Azilkërkuesit nga Siria, sipas të dhënave të publikuara, shihen si më të pranueshëm nga qeveritë evropiane.

Ndryshe, ulje të dukshme të numrit të azilkërkuesve në këtë tre mujor ka pasur Suedia, Britania e Madhe, Norvegjia dhe Italia.