Aksident tragjik në Bolonjë, humb jetën 18-vjeçari shqiptar

Shoferi 19-vjeçar shqiptar i plagosur, pasagjeri humb jetën në aksidentin fatal

Një aksident i rëndë rrugor i ka marrë jetën një 18-vjeçari shqiptar në Bolonjë, në orët e para të së premtes. Ngjarja ndodhi rreth orës 05:00 të mëngjesit në Via Murri, ndërsa një 19-vjeçar, po ashtu shqiptar, mbeti i plagosur dhe u dërgua në spital, transmeton albinfo.ch.

Dy të rinjtë, banorë të qendrave për të mitur të huaj të pashoqëruar, kishin rënë në sy të policisë në një semafor në Via Tolmino. Për shkak të dyshimeve mbi moshën e re të shoferit dhe pasagjerit, policia tentoi t’i ndalonte, por ata u larguan me shpejtësi.

Makina tip Audi u përfshi në një ndjekje të shkurtër, duke kaluar disa rrugë kryesore të qytetit, deri sa humbi kontrollin në një kthesë në Via dei Lamponi. Ajo u përplas me një shtyllë ndriçimi dhe një tabelë rrugore, duke u ndarë në dysh.

Pas goditjes, 18-vjeçari u hodh nga automjeti dhe vdiq në vend, ndërsa shoferi 19-vjeçar u transportua në Spitalin Maggiore me lëndime të mesme.

Në vendngjarje ndërhynë menjëherë policia, zjarrfikësit dhe ekipet e urgjencës, të cilat siguruan zonën dhe nisën hetimet për zbardhjen e plotë të rrethanave të aksidentit.

---