Presidentja Osmani nderon kontributin e mërgatës shqiptare në Amerikë

Gjatë vizitës së saj në Shtetet e Bashkuara, Presidentja e Kosovës, Vjosa Osmani, ka shprehur mirënjohje për bashkatdhetarët në Staten Island dhe për shoqatat “Ulqini”, “Dibra” dhe të gjitha organizatat e tjera për mikpritjen e jashtëzakonshme, përcjell albinfo.ch.

“Faleminderit të gjithë bashkatdhetarëve tanë në Staten Island dhe shoqatave ‘Ulqini’, ‘Dibra’ dhe të gjitha shoqatat e tjera për pritjen e mrekullueshme!”, ka shkruar ajo.

Presidentja Osmani ka theksuar gjithashtu se mërgata shqiptare në Amerikë ka luajtur një rol të rëndësishëm në historinë e Kosovës.

“Historia e Kosovës është e mbushur me sakrifica dhe përpjekje të përbashkëta. Në këtë rrëfim, mërgata jonë në SHBA ka shkruar një kapitull të ndritshëm, duke qëndruar gjithmonë pranë popullit tonë dhe duke dëshmuar se largësia nuk e zbeh kurrë dashurinë për atdheun”, ka shkruar Presidentja në rrjetet sociale.