Dua Lipa shkarkon menaxherin pas thirrjes për bojkot ndaj grupit pro-palestinez

Dua Lipa largon menaxherin pas përpjekjes së tij për të ndaluar reperët pro-palestinezë Kneecap në Glastonbury

Mësohet se Dua Lipa ka ndarë rrugët me menaxherin e saj, David Levy, pas një debati mbi performancën e reperëve Kneecap në Glastonbury, përcjell albinfo.ch.

Levy kishte nënshkruar një letër që kërkonte nga themeluesi i festivalit, Michael Eavis, që të ndalonte pjesëmarrjen e grupit pro-palestinez nga Belfasti, duke i akuzuar për nxitje antisemitizmi dhe mbështetje të Hezbollah. Letra u publikua më pas, duke zbuluar fushatën e tij kundër reperëve.

Një burim tha për The Mail on Sunday se Dua ishte e vendosur që Levy të mos punonte më me të, pasi qëndrimet e tij nuk përputheshin me mbështetjen e saj të hapur për Palestinën, shkruan DailyMail.

Pavarësisht fushatës së menaxherit, Kneecap performoi në Glastonbury. Një nga anëtarët e grupit, Liam Og O hAnnaidh, i njohur si Mo Chara, ishte në lirim me kusht për akuza të lidhura me terrorizmin, por performanca e tyre nuk solli ndërhyrje nga policia.

Grupi është kritikuar gjithashtu për mbështetje ndaj Hezbollahu dhe Hamas gjatë një shfaqjeje në Coachella.

Dua, 30 vjeç, e lindur në Kosovë dhe e fejuar me aktorin Callum Turner, ka qenë gjithmonë një mbështetëse e kauzës palestineze, duke dënuar dhunën në Gaza dhe duke u bashkuar me artistë të tjerë në protesta.

Ajo gjithashtu ka dënuar Hamasin, duke shprehur keqardhje për çdo jetë izraelite të humbur.

Përveç Dua Lipës, grupi muzikor Massive Attack gjithashtu ndërpreu bashkëpunimin me Levy për shkak të qëndrimeve të tij, ndërsa Dua vazhdon të jetë përfaqësuar nga një agjent tjetër brenda kompanisë së saj, William Morris Endeavor.

---