Qiratë mbeten të larta, ndonëse norma bazë u ul, çfarë po ndodh në Zvicër?

Ulje e normës bazë, por jo e qirasë, ku qëndron kontradikta?

Pavarësisht se Administrata Federale e Banesave (BWO) uli në mars normën e interesit referencë në 1.5 përqind, shumë qiramarrës në Zvicër nuk kanë përfituar nga kjo lëvizje, përcjell albinfo.ch.

Sipas një indeksi të ri të qirasë të publikuar të martën nga Banka Kantonale e Cyrihut (ZKB), vetëm 8 përqind e qiramarrësve në Zvicër dhe 14 përqind në kantonin e Cyrihut kanë marrë ulje të qirasë. Kjo ndodh megjithëse një përqindje shumë më e lartë e banorëve do të kishin të drejtë të kërkonin një zbritje në çmimin e qirasë.

ZKB thekson se, “duket se qiramarrësit janë më pak të prirur sesa më parë për të përfituar nga mundësia e fundit për të ulur qiranë”, ndonëse rreth 40 përqind e qiramarrësve në të gjithë Zvicrën dhe pothuajse 63 përqind në kantonin e Cyrihut aktualisht kanë të drejtë për një kërkesë të tillë.

Ulja e normës bazë të interesit zakonisht ndikon në rënien e çmimeve të qirasë, por këto të dhëna tregojnë një mungesë reagimi nga ana e qiramarrësve, ndoshta për shkak të mungesës së informacionit apo pasigurisë ligjore rreth mënyrës së paraqitjes së kërkesës.

---