Dritë jeshile për linjën e re hekurudhore Cyrih–Winterthur

Qeveria miraton zgjerimin hekurudhor mes Cyrihut dhe Winterthur

Duke marrë parasysh se “lidhja aktuale ndërmjet Cyrihut dhe Winterthur është e mbingarkuar”, Zyra Federale e Transportit (FOT) ka dhënë dritën jeshile për ndërtimin e një linje shtesë hekurudhore në këtë rrugë të rëndësishme, njoftoi të martën në një deklaratë për shtyp, përcjell albinfo.ch.

Projekti i ri përfshin ndërtimin e tunelit Brütten, i cili do të shërbejë si komponenti qendror i infrastrukturës së re. Me këtë zgjerim, rruga hekurudhore ndërmjet dy qyteteve do të ketë katër linja hekurudhore në të gjithë gjatësinë e saj, çka do të sjellë reduktim të kohës së udhëtimit dhe rritje të numrit të lidhjeve në transportin rajonal.

Sipas planifikimit aktual, përgatitjet për ndërtimin pritet të nisin në fillim të vitit 2026.

Ky investim përbën një hap të rëndësishëm drejt modernizimit të infrastrukturës hekurudhore zvicerane dhe synon të përballojë rritjen e vazhdueshme të numrit të udhëtarëve në këtë segment të ngarkuar.

---