Emigrantët, shtylla e fshehur e ekonomisë zvicerane

Zvicra nuk do të funksiononte pa emigrantët

Ndërsa Partia Popullore Zvicerane (SVP) vazhdon thirrjet për të kufizuar emigracionin, studimet tregojnë se ekonomia e Zvicrës nuk do të ishte kaq e fortë pa fuqinë punëtore të huaj, përcjell albinfo.ch.

SVP po promovon iniciativën “Jo për një Zvicër me 10 milionë banorë”, që pritet të hidhet në votim në vitin 2026, me synimin për të ulur ndjeshëm numrin e emigrantëve nga BE dhe vendet e EFTA-s.

Megjithatë, kërkimet nga EPFL dhe Universiteti i Gjenevës tregojnë se të huajt janë thelbësorë për tregun e punës dhe stabilitetin ekonomik të vendit. Rreth 60% e emigrantëve me leje qëndrimi B ose C kanë diplomë universitare, ndërsa pjesa tjetër punon në sektorë që vuajnë nga mungesa e stafit – si shëndetësia, ndërtimi dhe shërbimet.

Sipas ekonomistit Andreas Beerli, në kantone si Cyrihu dhe Zugu, 75% e emigrantëve të rinj kanë arsim të lartë, dhe ata shpesh plotësojnë boshllëqet që punëtorët vendas nuk i mbulojnë.

Kontributi i emigrantëve shtrihet edhe në financat publike. Ata paguajnë më shumë taksa dhe kontribute për sigurimet shoqërore sesa përfitojnë. Një studim i universiteteve të Cyrihut dhe St. Gallen zbuloi se në vitin 2023, personat e lindur jashtë Zvicrës paguan më shumë se 40% të kontributeve totale, por morën më pak se 30% të përfitimeve.

Pra, pavarësisht debatit politik, faktet tregojnë qartë: emigrantët janë një shtyllë thelbësore e ekonomisë dhe sistemit social zviceran.

https://actu.epfl.ch/news/immigration-from-cliches-to-economic-competitivene/

---