Ditët e Diasporës në Prishtinë nisin me bakllava, tespishte e revani

Për nder të manifestimeve Ditët e Diasporës  me moton “Mirëserdhët në vendin tuaj”, Rinia Demokratike e Kosovës (RDK) e ka mbajtur një aktivitet në Aeroportin Ndërkombëtar të Prishtinës “Adem Jashari”, të Prishtinës, me ç’rast të gjithë bashkatdhetarët që ateruan të dielën u shërbyen me ëmbëlsira tradicionale-bakllava, tespishte dhe revani.

Sipas një komunikate që ka dërguar për media RDK-ja, Kryetarja e këtij forumi, Shpresa Rama, ka thënë se të gjithë ata që u bënë pjesë e këtij aktiviteti mbetën të kënaqur me pritjen që ua bën njerëzve që ateruan në tokën e tyre.

“Zhvilluam një aktivitet simbolik në nderim të përkushtimit dhe atdhedashurisë së bashkatdhetarëve tanë. Ata që nuk ishin në dijeni për këtë aktivitet u befasuan për të mirë me kë pritje, organizuar enkas për ta. Madje shprehën se kjo pritje ishte befasi e këndshme sepse deri më sot askush nuk i kishte pritur në këtë mënyrë”, ka thënë Rama.