Parlamenti dëshiron të kufizojë pagesat për kujdesin familjar

Sipas një raporti të Këshillit Federal, këto shërbime i kushtuan sigurimit të detyrueshëm shëndetësor gati 55 milionë franga në vitin 2024

Nëse individët privatë kujdesen për anëtarët e familjes së tyre, shërbimet e tyre duhet të paguhen vetëm nga sigurimi shëndetësor në raste të jashtëzakonshme dhe me standarde të qarta cilësie. Pas Dhomës Nacionale të Parlamentit, edhe Dhoma e Kantoneve po bën thirrje për këtë, transmeton albinfo.ch.

Të hënën, Dhoma Nacionale miratoi një mocion nga Thomas Rechsteiner (Qendra/AI), i cili, pas këtij miratimi të dyfishtë nga të dyja dhomat e Parlamentit Zviceran, tani do t’i përcillet Këshillit Federal për zbatim.

Dhoma më e vogël (e kantoneve) e miratoi mocionin me 41 vota pro, 0 kundër dhe një abstenim., shkruan sda.ch. Me këtë mocion, Këshilli Federal është i ngarkuar me ndryshimin e Ligjit Federal për Sigurimin Shëndetësor.

Brigitte Häberli-Koller (Qendra/TG), duke folur në emër të komitetit paraprak të Sneatit për sigurinë dhe shëndetin (SGK-S), tha se ekzistonte një “nevojë urgjente për veprim”. Sipas një raporti të Këshillit Federal, këto shërbime i kushtuan sigurimit të detyrueshëm shëndetësor gati 55 milionë franga zvicerane në vitin 2024.

Të dhënat treguan gjithashtu se rritja e orëve të kujdesit i atribuohej disa organizatave private të specializuara në punësimin e kujdestarëve familjarë. Kjo ishte veçanërisht problematike.

Mirëkuptim i ministres Baume-Schneider

Këshilli Federal rekomandoi refuzimin e mocionit, por Ministrja e Shëndetësisë Elisabeth Baume-Schneider shprehu mirëkuptim për shqetësimet e të dy dhomave të parlamentit, përcjell albinfo.ch. Ajo deklaroi se veprimi ishte i nevojshëm, por se ishte gjithashtu e rëndësishme të merrej në konsideratë se shoqëria mund të varet nga kujdestarët familjarë në planin afatgjatë.

Pas një vendimi të vitit 2006 nga Gjykata Federale e Sigurimeve – tani pjesë e Gjykatës Supreme Federale – punësimi dhe shpërblimi i kujdestarëve familjarë u zgjerua ndjeshëm. Që atëherë, kujdestarët familjarë kanë qenë në gjendje të punësohen dhe të paguhen nga një organizatë kujdesi në shtëpi.

---