Asnjë kaos nga ndryshimi më i madh i orareve të transportit publik në Cyrih

(Keystone/ Til Buergy)

Ndryshimi më i madh në historinë e transportit publik të qytetit të Cyrihut nuk ka shkaktuar kaos. Të hënën në mëngjes, rreth 800 mijë përdorues ditorë të transportit publik (VBZ) u përballën me një realitet të ri, pasi që nga e diela kanë hyrë në fuqi ndryshime të thella në orare dhe në rrjetin e transportit.

Në terren, megjithatë, kalimi drejt sistemit të ri po zhvillohet pa pengesa të mëdha. Vetëm disa udhëtarë u panë disi të hutuar, sipas një gazetari të RTS-së në vendngjarje. Duhet theksuar se mediat e Cyrihut i kanë shpjeguar këto ndryshime prej disa javësh.

Për të ndihmuar pasagjerët, 60 punonjës të VBZ-së, përfshirë edhe anëtarë të menaxhmentit, janë angazhuar në pika kyçe të qytetit. Prania e tyre do të vazhdojë edhe për disa ditë, për t’u dhënë përdoruesve kohë të mjaftueshme për t’u përshtatur me sistemin e ri, transmeton albinfo.ch.

Ndryshimet janë të tilla që edhe udhëtarët më me përvojë mund të humbasin orientimin: dhjetë nga katërmbëdhjetë linjat e tramvajit tani ndjekin trasa të reja ose të modifikuara, duke e ndryshuar ndjeshëm hartën e transportit urban.