Trump njoftoi se po dërgon një anije spitalore në Grenlandë, reagon Danimarka

(AP Photo/Luis M. Alvarez)

Presidenti amerikan, Donald Trump, ka deklaruar se po dërgonte një anije spitalore në Grenlandë, deklaratë pas së cilës, Danimarka ka thënë se Grenlanda nuk ka nevojë për ndihmë mjekësore nga vendet e tjera.

“Popullsia e Grenlandës merr kujdesin shëndetësor që i nevojitet. Ata e marrin atë ose në Grenlandë, ose, nëse kërkojnë trajtim të specializuar, e marrin atë në Danimarkë. Pra, nuk është sikur të ketë nevojë për një iniciativë të veçantë shëndetësore në Grenlandë”, tha ministri i Mbrojtjes i vendit, Troels Lund Poulsen, për transmetuesin danez DR, transmeton albinfo.ch.

Mette Frederiksen, kryeministrja daneze, mbrojti sistemin e kujdesit shëndetësor të Danimarkës, duke shkruar në Facebook se ishte “e lumtur që jetonte në një vend ku ka qasje falas dhe të barabartë në shëndetësi për të gjithë. Ku nuk janë sigurimet dhe pasuria ato që përcaktojnë nëse merrni trajtim të duhur”.

“Keni të njëjtën qasje në Grenlandë. Gëzuar të dielën të gjithëve”, ka shkruar ajo.