Më 8 mars në Cyrih, panel mbi sfidat e grave në familje dhe shoqëri

Tryeza mbahet më 8 mars 2026, nga ora 15:00, në GZ Oerlikon, Cyrih

Me rastin e 8 Marsit, Ditës Ndërkombëtare të Gruas, Ambasada e Republikës së Kosovës në Bernë, në bashkëpunim me shoqatën “Parandalo”, organizon në Cyrih një tryezë diskutimi me temën “Gratë dhe dhuna në familje dhe shoqëri”.

Paneli do të hapet me pjesëmarrjen e Zëvendëskryeministres së Republikës së Kosovës dhe Ministre e Drejtësisë, Donika Gërvalla, dhe do të vijojë me kontributin e panelisteve:

Dr. Feride Rushiti, mjeke dhe drejtoreshë ekzekutive e Qendrës Kosovare për Rehabilitimin e të Mbijetuarve të Torturës (KRCT)

Shyhrete Tahiri, aktiviste e çështjeve sociale dhe të drejtave të grave

Dr. Xhida Lumi, mjeke në Zvicër dhe ligjëruese në fushën e shëndetit

Dr. Luljeta Shaqiri Emini, psikologe dhe eksperte e shëndetit mendor në Zvicër

Kjo tryezë synon të trajtojë sfidat me të cilat përballen gratë në kontekstin e dhunës në familje dhe në shoqëri, duke nxitur një dialog të strukturuar mbi mekanizmat e mbështetjes, rritjen e ndërgjegjësimit shoqëror dhe rolin e institucioneve në parandalimin dhe trajtimin efektiv të kësaj dukurie.
Ngjarja pritet të shërbejë si një hapësirë e rëndësishme bashkëbisedimi ndërmjet institucioneve, ekspertëve dhe komunitetit, duke reflektuar mbi përgjegjësinë kolektive në ndërtimin e një shoqërie më të drejtë dhe më të sigurt për gratë.

Aktiviteti do të përmbyllet me një performancë muzikore nga kori “Lyra”.

Tryeza do të mbahet më 8 mars 2026, nga ora 15:00, në GZ Oerlikon, Cyrih, dhe është e hapur për përfaqësues të mediave, institucioneve dhe publikun e interesuar.

---