Dy të rinj nga Mitrovica humbin jetën tragjikisht në një aksident në Itali

A.A (21 vjeç) dhe F.P (27) vdiqën si pasojë e një përplasjeje të rëndë në autostradën A4, në drejtim të Triestes

Një aksident i rëndë trafiku me pasoja fatale ka ndodhur të premten në Itali, ku jetën e kanë humbur dy të rinj nga Mitrovica, shkruan albinfo.ch.

Sipas informacioneve fillestare, ngjarja ka ndodhur rreth orës 15:40 në autostradën A4, në drejtim të Triestes. Dy të rinjtë, të identifikuar me inicialet A.A (21) dhe F.P (27), po udhëtonin me veturë dhe, referuar raportimeve, ishin nisur në drejtim të kufirit me Slloveninë kur janë përplasur me shpejtësi të lartë me një kamion që transportonte mallra të ndryshme.

Përplasja rezultoi fatale për të dy, të cilët humbën jetën në vendngjarje si pasojë e lëndimeve të marra.

Autoritetet përkatëse në Itali kanë nisur hetimet për zbardhjen e plotë të rrethanave të aksidentit.

Familjet e viktimave janë njoftuar për rastin nga Ambasada e Kosovës në Itali, ndërsa pritet që në ditët në vijim të bëhen të ditura detaje të tjera lidhur me procedurat e mëtejshme./Albinfo.ch

---